воскресенье, 16 октября 2016 г.

Прадед наш Каин сквернав родися

Прадед наш Каин сквернав родися. Глава на нем, яко и на протчих человецех, на персех и на челе его дванадесять глав змииных име. Егда же Евва сосцы своими питаше, тогда змиевы главы чрево ея терзаху, и от того терзания и лютаго мучения прабаба наша Евва окрастовела. И виде Адам жену свою страждущу вельми, скорбяше о ней. И прииде к нему диавол во образе человека и глагола ему: «Что ми даси? И исцелю сына твоего Каина и жену твою Евву, от таковаго мучительства свобожду». И глагола Адам ему: «Да что ти дам?» И рече диавол: «Даси на ся рукописание». И рече ему Адам: «Каковое дам ти рукописание?» И глагола ему диавол: «Заколи козлища и назнаменуй на камени, еже дам ти, и рцы сице: живыи Богу, а мертвыя тебе». И сотвори Адам, якоже повеле ему диавол, и принесе ему плиту велию каменну. И закла Адам козлища, и источи кровъ в сосуд, и омочи обе руце свои в крови той, и положи руце свои на плите той белаго камня. Изообразишася руце Адамовы на плите той. И прииде диавол к Каину, и оборва дванадесять глав змииных, и положи их на камень и на рукописание то, и въверже оную еже бо во Иордан реку. И заповеда диавол главам змиевым стрещи то рукописание. И бе хранимо теми главами до пришествия Господа нашего Исуса Христа. И егда прииде на Иордан ко Иоанну креститися, нашего ради спасения, тогда змиевы главы сташа в струях Иорданских противу Господа. И ту сокруши змиевы главы в воде. И виде диявол главы змиевы сокрушены. Тогда възя диавол и останок того рукописания и вънесе во ад, иже бы заключени быша святыя. Егда же Господь наш Исус Христос воскрес из мертвых, тогда и останок того рукописания Адамова растерза и заглади, и диавола связа, а души святых из ада съвободи и в первую породу въведе к своему Отцу и к своему хотению.

Комментариев нет:

Отправить комментарий